Maisha na utume wa Familia

Baraza la Maaskofu Katoliki Hispania, limehitimisha mkutano wake maalum uliojadili kwa kina mapana kuhusu Sinodi ya Maaskofu kuhusu Familia itakayoadhimishwa mjini Vatican kuanzia tarehe 4 hadi tarehe 25 Oktoba 2015. Maaskofu wamepokea taarifa ya Tume ya Familia Baraza la Maaskofu Katoliki Hispania kuhusiana na majibu ya maswali dodoso yaliyotumwa kwa waamini na watu wote wenye mapenzi mema, tayari kuyatuma kwenye Sekretarieti kuu ya Sinodi mjini Vatican.
Mwisho wa kutuma majibu ya maswali dodoso yatakayotumika kuandaa hati ya kutendea kazi ni hapo tarehe 15 Aprili 2015. Itakumbukwa kwamba, Sinodi ya Maaskofu inaongozwa na kauli mbiu “Wito na utume wa Familia ndani ya Kanisa na katika ulimwengu mamboleo”. Maswali dodoso ni mchango uliotolewa na Mababa wa Sinodi maalum ya Maaskofu iliyofanyika mwezi Oktoba, 2014 hapa mjini Vatican.
Baraza la Maaskofu Katoliki Hispania linasema kwamba, Familia ya Mungu nchini humo inaendelea kuadhimisha Jubilee ya miaka 500 tangu alipozaliwa Mtakatifu Theresa wa Avila, kumbukumbu ambayo itafikia kilele chake hapo tarehe 25 Machi 2015. Maaskofu Katoliki Hispania wataanza mkutano wao wa mwaka tarehe 20 Aprili na tarehe 24 Aprili 2015 watafanya hija ya maisha ya kiroho kwa kutembelea Monasteri ya Fumbo la Umwilisho na kuadhimisha Ibada ya Misa Takatifu, mahali alipoishi Mtakatifu Theresa wa Avila.
Itakumbukwa kwamba, Baraza la Maaskofu Katoliki Hispania limeandaa kongamano la kimataifa la vijana kutoka Barani Ulaya litakalofanyika mjini Avila kuanzia tehe 5 hadi tarehe 9 Agosti 2015. Maaskofu wanaandaa mbinu na mikakati itakayoliwezesha Kanisa nchini humo kuwa ni chombo cha huduma kwa maskini na wote wanaosukumizwa pembezoni mwa jamii. Wanaangalia jinsi ya kuwa na mgawanyo bora zaidi wa Mapadre kwa ajili ya huduma kwa Familia ya Mungu nchini Hispania sanjari na mikakati ya shughuli za kichungaji kwa mwaka 2016 – 2020.
Na Padre Richard A. Mjigwa, C.PP.S.
Idhaa ya Kiswahili ya Radio Vatican.